لْهدْرا ن ربّـي س ثمازيغث ن غمارا (ثغوماريث)

مرحبا بكم! ؤُهَاذ لْإِنْجِيل ن سِيدِينغ عِيْسَى لْمَسِيح س شّلْحَا ن غُمَارَا. لْإِنْجِيل غْرس سبْعَا و عِشْرِين ن سُّوْرَات۔ ئِدْجن زْݣَاسن قّْرن-اَس لكْتَاب ن سِيدْنَا مَرْقُس. ئِقّر سِيدِينغ عِيْسَى ݣِي سُّوْرَا ن سِيدْنَا مَرْقُس 13: 24-27، "منْبَعْد تَمَارَا ن لْأَيَّامَاث إِهن، تَفُوْڬْت دَا قُّوْل-د اَسلَّاس اَي وَار مَا يفكّْ شِي ضَّاو. نّْجُوْم حصْلن زݣ اَنَّا، ؤُهِين اَيْجهْدن ݣ اَنَّا شَاغْنِي هزّن ربِّـي. ݣِي تَسَاعَت اَهن شَا ژْرن اَعيَّال ن بْنَادم هوَّا-د ݣِي سْحَاب س لْعَظَامَا ن لْجُهْد نّس يمُوْقّْرن. شَاد يُوْمر لْمَلَائِكَاث نّس دَار اَربْعَا ن لمْوَاضَع ن ترْحَابْت سْمَانَا يتُوْثُّوْ-د اَرْوَاح: شَّرْق إِذ لْغَرْب إِذ لْجَنُوْب إِذ شَّمَال. شَا جْمع ؤُهِين اَلَّا يخْطَر زݣ لْحَادّ ن دّنْيَا-يَاذ دَار لْحَادّ ن اَنَّا."

عَاود يقّر سِيدِينغ عِيْسَى ݣِي لْأَيَاث 35-37، "خف اَيْهَاد فِيقَاوْث بَعْدَا، مَا يسّْنم شِي فَايْوخ شَا قُّوْل-د مُوْل اَخْيَام. مَا يَاسّْنم شِي كَا ݣِي لَعْشِيَا اَوْلَا ݣ وَامَّاس ن وسَالَّاس اَوْلَا زْݣَاي يتْبرَّاح اَبْدِيڬ اَوْلَا ݣِي لفْجَر. اَغْرُن اَد يدُّو عْلَاغْفْلَا اَوِين اَف تطّْصم! شْوَا قَّرْغ-اَوم، قَّرغ-ت إِ كُلْشِي: أَلَّاوْت خف لْبَال!"

ئِقّر عَاود ݣِي لْأَيَا 31، "شَا فْنَا اَنَّا إِذ تَرْحَابْت، وَلَكِن لْهضْرَا ينُو مَا يَافْنَا شِي عُمّْرَا." لكْلَام ن سِيدِينغ عِيْسَى مَا يَافْنَان شِي عُمّْرَا. هَام دْهَادِين سمَّا اَهن هقّْرم ݣِي سُّوْرَا ن سِيدْنَا مَرْقُس س لُّغَا نُّوْن. قّْرَاوْث-اَهن، وجّدَاوْث إِغْفل نُّوْن عْلَاحْسَاب نْهَار اَهن الَّا شَا دُّو. عْلَاحقَّاش "عيّن، نْهَار اَهن اَو تَسَاعَت اَهن مَا يَات يسّن حْتَاين، لَّا لْمَلَائِكَاث ݣِي اَنَّا وَالَا اَعيَّال نّس. ئِسّن-ت غِير بَابَا وَاحْدُو. حضْيَاوْث إِغْفل نُوْم، اَلَّام عْلَابَال عْلَاحقَّاش مَا يسّْنم شِي فُوْقَاش شَاد دُّو لْوقْت اَهن" (مرقس 13: 32-33).