تْهَادِين تَبْرَاث تَانْيَا ن رَّسُول بُطْرُس يَان زݣ لمْحَاضْرَا لُّولِيْـيِـين ن سِيدِينغ عِيسَى لْمَسِيح.
3:3 شْوَا ئِلَّان مُهِم ݣَاع؟ ئِخصّْ ؤُ لَابُدَا دَا فهْمم بلِّي ݣِي لْأَيَامَاث إِهِن لّخْرِيْـيِـين دَا ٱلّن مُوجُودِين مدّن أَ يْضصّن خْفُون، دَا ضصّن دَا تبْعَن شّهْوَاث نْسن ؤُ صَافِي. 4 شَا قَّرن-اَون نتَّا ئِوَعَد دَا قُّولْ-د، إِيوَا اَنَا يّن؟ زْݣَا طّْصن لجْدُود نّغ صَّالِحِين ݣِي لْمَوْت ݣَاع لْمَسَائِيل-إِذ تُّوثُون اَمْڬَا ݣ لَّان تُّوثُون زْݣَا هخْلق دُّنْيَا. 5 عَاين، مدّن-إِذ مَحْتِيجن دَا عَقْلن خ يَاه ن لْحَجَا أَ يْلَّان بصَّح يعْنِي ݣِي زْمَان اَهن اَيقْدِيمن ئِخْلق-د ربِّـي اَنَّاوَاث س لُوصِيَا نّس ئِسَّافغ-د دُّنْيَا-يَاذ زݣ وَامَان ئِدوّر-اَه-يد س وَامَان. 6 منْبَعْد ئِغرّق دُّنْيَا ن لْوقْت اَهن س وَامَان-إِذ س يَان ن طُّوفَان ئِمْحَا-ت. 7 أَمِيلَّا عَاوذ س لُوصِيَا نّس خبّْعن اَنَّاوَاث إِذ تَرْحَابْت ݣِي لْوقْت-أَذ دَار لْعَفْيَا، وجْدن إِ نْهَار ن لْحِسَاب إِي لْعِقَاب دَا فْنِي ؤُهِين أَ لَّا مَا طِيعَان شِي إِ ربِّـي.
